ياطير ياللي بالخضيراء  لمحناك = أبيك لي ياطير ساعي بريدي


خذ الكتاب  وسلمه صاحبي ذاك = راع الفخر والطيب ولد الصعيدي


ياجيت له بأحلى الكلام يتمعناك = عده يعرفك من زمان مديدي


تقول له عشرين عام يتمناك = بأسلوب لبق مثل نقد المجيدي


قل هذ كتاب اللي على طيبك أغلاك = وصلح جميلك ياكعام الضديدي


يا سعود خذ خط أبو فيصل بيمناك = يحمل بطياته سلام وحميدي


ياسعود بن صالح قديم عرفناك = ياللي  ببنك الطيب تملك رصيدي


كم مرة ياطير شلوى  نصيناك = وقضيت لازمنا مثل ما نريدي


المدح يزها  رجل مثلك وشرواك = ياطير شلوى اللي علومك بعيدي


كم مرة دفعت يمي هداياك = ومنافعك وصلت لناس بعيدي


حتى جهينه شرفتهم عطاياك = وشمر وعناز وتميم ورشيدي


ياشمري نومستنا في سواياك = جماعتك  كل بعلمك سعيدي


أنته زهيت المدح والمدح يزهاك = تنكة ولد فلجا لقولي  شهيدي


ياسعود في زين المثايل شكرناك = وبطيبكم  يا ما  نظم من قصيدي


مهما تطول ايامنا ما نسيناك = طيبك بنا مبطي وزدته جديدي


تقضي لزوم اللي زبنك وتنصاك = بعزم قوي مثل صلب الحديدي


لو ما هنا ريال تضمه بمخباك = الوجه شيكات تضم الرصيدي


وبيتك تداحم به هذولا وهذولاك = وبفلاحتك  كل  يسيد   ويميدي


نار الدلال اللي على طول تصلاك = طول الزمن سنا لهبها يزيدي


كل كلا زادك وكل شرب ماك = ياذابح الجزلات لطلقين الأيدي


الله يكثر بين الاصحاب حلياك = ذخر  لنا   ياجاء الزمان  الشديدي


الله يديمك يابو صالح ويحماك = من شر جورات الزمان العنيدي


وإن جاك من ميلات الأيام ضكاك = حنا وما نملك كثير   او   زهيدي


جميع ما تملك يدينا فداياك = تستاهله  هذا الكلام الأكيدي


عسى ليا جينا مسايير نلقاك = شوفك دقيقه عدها يوم عيدي